Marie de la Marche (comtesse de Sancerre)

« Jean de Vescy contracte en 1279 un mariage "per verba de presenti" avec Marie de Lusignan, sœur d'Hugues XIII, sous la houlette de Guy de Cognac. Neuf ans plus tard, en décembre 1288, Hugues XIII négocie un nouveau contrat de mariage entre Marie et Étienne II de Sancerre. Par ailleurs, son testament de 1283 demande qu'elle reçoive le revenu qui lui avait été attribué dans celui de leur père. Cette clause, qui ne concerne que Marie, laisse penser qu'elle est alors célibataire. Or, quand Jean de Vescy meurt le 10 février 1289, il est marié à Isabelle de Beaumont. L'absence d'informations supplémentaires nous amène à supposer une séparation intervenue très tôt entre les deux époux. »

« Nous Hugues li Bruns, cuens de la Marche et nous Estienes, cuens de Sanceurre fesons savoir a touz ceus qui ces lettres verront que nous on traitie du mariage de nous Estiene desus dit et de noble damoisele Marie de la Marche sereur de nous Hugue devant dit avons eu et convenancie sollempnelment les convenances qui sensuivent. C'est a savoir que nous li diz Hugues, cuens de la Marche avons donne et ottroions en mariage au dit Estiene conte de Sancerre la dite Marie nostre sereur, et en non de mariage et pour le dit mariage avons donne aveques la dite Marie sis cenz livres tournois de rente perpetuel en deniers quites et deliveres de touz fais, charges liens et obligacions et deuz a nous conte de la Marche et a noz hoirs perpetuelement de nostre seigneur le roy de France pour reson dun don que li cuens de Poitiers Anfons fist a nostre ayeul monseur Hugue le Brun a prendre a avoir et apartenoir dudit Estiene conte de Sancerre de la dite Marie et des hoirs qui istront daus chascun an paisiblement aus termes qui sensuivent : c'est a savoir a chascune feste de la nativite saint Jehan baptistre trois cenz livres et a la feste de Nativite nostre seigneur trois cenz livres aussit en deniers nombrez, les quels sis cenz livres, nous, Hugues de la Marche teniens en fie de nostre seigneur le roy de France. Et avons promis a faire et procurer a recevoir paisiblement le dit conte de Sancerre en la foy le dit nostre seigneur le roy des dites sis cenz livres de rente. Derechief, nous Hugues desus diz avons volu, ottroie et donne avecques les dites sis cenz livres de rente au diz Estiene, Marie et leur hoirs pour reson du dit mariage deus cenz livres de rente en heritage perpetuel en deniers a prendre chascun an le jour de feste saint Andrieu lapostre au Temple a Paris tantoust empres nostre deces a avoir et a parcevoir chascun an paisiblement des diz Estiene, Marie et leur hoirs et a paier de celui qui sera tenanz nostre contee de la Marche empres nostre deces sus poinne de vint solz tournois chascun jour que li diz nostre successeur tenant la contee defaudroit de paie des dites deus cenz livres pour touz pour mises et pour despenz a parer au diz Estienne, Marie et leur hoirs ensamble le principal avet la poinne. Des quels deus cenz livres de rente li diz cuens de Sancerre, la dite Marie et li hoir daus feront homage a noz hoirs tenanz la contee de la Marche. Et nous Estienes desus diz pour les dites huit cenz livres avons quite au dit Hugues conte de la Marche et aus siens pour nous, pour noz hoirs et pour noz successeurs tout le partage et le droit et la succession que nous porions avoir par reson de la dite Marie envers le dit Hugues, conte de la Marche et ses hoirs en toute la terre, leritage et les biens de par pere et de par mere ou dautre partie, sauve et retenu a nous et a la dite Marie et aus hoirs qui steront de nous le droit et la reson que la dite Marie devroit avoir en la terre et es biens dudit Hugues, conte de la Marche se li diz cuens moroit sanz hoirs descendant de son cors, en tele maniere que non contreestanz les convenances de ceste lettre li diz cuens pourra ordener de ses biens et de son heritage en vie et a mort a sa volente. Et avons promis a faire ferme et estable de la dite Marie ceste quitance le mariage acompli et a donner au dit conte de la Marche pour nous e a faire et a curer que la dite Marie donra a la requeste du dit conte de la Marche souffisant lettre seellee du seel nostre seigneur le roy de la quittance del heritage de par pere et de par mere en la maniere desus dite. Et avons donne et ottroie en doayre a la dite Marie nostre meson du Baile dessous Sancerre, et deus cenz livrees de terre a tournois a parfaire et a asseoir au plus pres de la dite meson et avec ces deus cenz, cinc cenz livres de rente a tournois a prendre, a recevoir et a avoir en nostre terre de la Ferte de la Lopiere, et se la terre de la Ferte ne pooit souffire a parfaire et a acomplir les dites cinc cenz livrees nostre hoir seroient tenu a parfaire au plus pres des lieuz dessus nommez. Et avons octroie que se il avenoit que noble dame Marie contesse de Sancerre nostre mere moroit avant que la dite Marie de la Marche, la dite Marie de la Marche seroit doee et la prometons a doer deu chastiau de Meillant et de la moitie de toute la terre que nous tandron et auron ou tans avenir par succession de pere et de mere et par autre reson excepte le chastiau de Sancerre et li premiers doyre dessus diz soroit nus. Et nous li dit Hugues avons promis et prometons a garantir parmenablement les dites huit cenz livres de rente aus diz conte de Sancerre, Marie et leur hoirs contre touz, a noz couz et de noz hoirs. Et nous Estienes desus diz, le dit doayre a la dite Marie, contre touz aus touz de nos hoirs. Et quant a toutes les choses dessus dites et chascune par soi fermement tenir et garder et de non venir encontre, nous, diz Hugues, cuens de la Marche, et Estienes, cuens de Sancerre, avons obligie li uns a lautre, nous, noz hoirs, et noz biens et les biens de noz hoirs presenz et avenir a painne de deus mile mars dargent. Les convenances demoranz fermes et estables soit que la dite painne fust commise et paiee de luns partie a lautre. Et renoncons a toutes barres et excepcions de fet et de droit qui pourroient estre obiviees encontre ce present instrument. Et soupplions a nostre chier seigneur le roy de France que il toutes ces convenances desus dites vueille confermer souz la teneur de son seel en la fourme et en la maniere dite. Et pour ce que ces choses soient fermes et establies, nous Hugues et Estienes desus diz avons seellees ces presentes lettres de noz seaus. Donnees lan de grace mil deus cenz quatre vinz et huit ou mois de decembre. »